Tristan muose sunder sînen danc
Stæte sîn der küniginne
Wan in der poysûn dar zuo twanc
Mêre dan diu kraft der minne
Des sol mir die guote danc
Wizzen, daz ich solken tranc
Nie genam und ich sie doch minne
Baz danne er, und mac daz sîn
Wol getâne, valsches âne
Lâ mich wesen dîn und bis du mîn
Sît diu sunne ir liehten schîn
Gegen der kelte hât geneiget
Und diu kleine vogellîn
Ir sanges sint gesweiget
Trûric ist daz herze mîn
Ich wæne, ez wil winter sîn
Der uns sîne kraft erzeiget
An den bluomen, die man siht
In lichter varwe, erblichen garwe
Dâ von mir beschiht, leit und anders niht
