O Computer

Ormai o mondo l'è informatizzou,
se no ti stæ a-o passo ti t'è fregou,
coscì ho deciso, da lunedì,
un bello computer m'accatto anche mì.

E finalmente me l'han installou,
o ciù veloxe, o ciù attrezzou,
oua ve conto, a no l'è 'na pansann-a,
cosse m'è successo in te 'na settemann-a.

O primmo giorno me g'assetto davanti,
pè non inciasträlo m'infïo anche i guanti,
o creuvo ben pè avvardâ a vernixe,
a garansia a metto in cornixe.

E martedì l'è arrivou mæ cuxin,
che l'è vint'anni ch'ou vive a Dublin,
o me dixe: "I like your house",
e comme d'incanto sparisce o mæ mouse.

Poi se presenta so figgio Johanni,
c'ou pâ 'na scròssua d'attaccapanni,
o parla in ingleise, no capiscio un belin,
capiscio, però, ch'o fà feua o tappetin.

Mercoledì mæ barba Pasquale,
che a forsa de troffie o peisa un quintale,
o molla 'na quägia, ghe cazze a dentëa,
o polverissa a povia tastea.

Zeuggia mæ figgio che o l'è sempre fêua,
o vegne insemme ai compagni de schêua.
"Dovemmo fâ 'na riçerca in scè Dante",
xattan o modem e pure a stampante.

Venerdì, 17, arria mæ moggê,
che me s' inghèugge sempre in t'ì pè,
cö detersivo a se mette a pulì,
và in cûrto-circùito o lettore C.D.

Sabbo mæ figgia ch'a l'ha pè galante
un "pescou de canna" de Sestri Levante,
sempre in ritardo pè corrî a-a stazion,
s'ingamba in tò cavo d'alimentazion.

Domenega poi de primma mattinn-a,
mì ëo bersagliere, no son 'na belinn-a,
voeivo sarvâ tutto quello che resta,
me inciampo pè-e scae, me rompo anche a testa.

E a mæ illusion de tecnologia,
in t'è 'na settemann-a a l'è proprio svania,
son triste, avvilio, no gh'a fasso ciù,
ma...son sempre i stessi a piggialo in tò cû