Palästinalied

Nû alrêrst lebe ich mir werde
Sît mîn suendig ouge siht
Daz reine lant unde ouch die erde
Der man sô vil êren giht
Mir'st geschehen, des ich ie bat
Ích bin komen an die stat
Dâ got menschlîchen trat

Schoeniv lant, rîch unde hêre
Swaz ich der noch hân gesehen
Sô bist dûs aller êre
Waz ist wunders hie geschehen
Das ein magt ein kint gebar
Hêre ueber áller engel schar
Wáz das niht ein wunder gar

Hie lies er sich reine toufen
Daz der mensche reine sî
Dô liez er sich hie verkoufen
Daz wir eigen wurden frî
Anders waeren wir verlorn
Wól dir, spér, kriuze únde dorn
Wê dir, heiden, dáz ist dir zorn

Dô er den tievel dô geschande
Daz nie Keiser baz gestreit
Dô vour er her wider ze lande
Dô houb sich der juden leit
Daz er hêrre huote brach
Und daz man in sît lebendic sach
Den ir hant sluoc unde stach

Cristen, Juden unde heiden
Jehent, daz dir ir erbe sî
Got sol uns ze reht bescheiden
Dur die sîne namen drî
Al diu welt, diu strîtet her
Wir sîn an der rehten ger
Reht ist, daz er uns wer