Musiqueada Jazmín Guýpe

Arrieromi che rekópe
Mbaraka che jyva ári
Ko che apyka puku ári
Hi'ãnte chéve añatõi
Che kûre péina heñói
Che mboraýhu ra'ỹingue
Ñe'ê poravopyre
Ndéve g̃uarã purahéi

Aipotánte sapy'a
Reñandu nde rogaguýpe
Vevúi asy nde keguýpe
Hasêro che mbaraka
Ha upégui terepu'ã
Ko'a jazmín mataguýpe
Rejajáivo ñasãindýpe
Torohetû, che kamba

Péina ko'ápe yvoty
Hyakuãvu nera'ãrõvo
Ha ojaivy nderesapévo
Lucero nde kypy'y
Na epu'ãna, che reindy
Ko'a nde roka mbytévo
Jasy nde ryke oikevo
Taneretû nde kyvy

Hetaite mba'e porã
Ogueru ko ko'êtî
Epáyna ehechami
Oje'óiva y reka
Ha aipópe ne vecindad
Torývaicha ombohovái
Oiko ñembiso jovái
Opáva ipu jeguaka

Ko'êmbotáko añandu
Ajevérõ ipopy'ỹ
Gallokuéra osapukái
Ha okokore ryguasu
Hetakuére guyraû
Ojeheka pe avatitýre
Ha amoite jahapetýre
O-relinchá kavaju

Néi, chéko che reindy
Iporãma roheja
Ivai che raperã
Ha hi'ári mombyry
Ha amóina ave kuarahy
Amoite ára rapópe
Cerromi pa'û mbytépe
Ojajái hata rendy