Inda Bem (part. Trakinuz)

Mi so
Akunpanhadu pa nha própi konpanhia, diskalsu N ta peregrina na kalsadas di vida
Disípulu di Juzué N ta travesa riu Jordãu i muralhas di Jerikó rumu a térra prumetida
Sen grandis prumésas ma N ta volta dipos di ida
N ta prumete volta pa nha pontu di partida
Undi ki N prende ma nada N ka pode prende ma nha filisidadi so di mi ta dipende
Vida prizentia-m ku solidon pa N pode prende ser filis ku nha prizénsa
I oxi N ta spresa nha gratidon pa tudu mumentus bon k'u kunpanha-m ku bu ozénsia
N ridiskubri mi mê, N obi nhas própi konsedju
N diskubri nha grandi amor kantu ki N djobe na spedju
N prende ma ser filis é un méru kiston di skolha
Nu skodje faze ben já ki nhas skolhas ta faze-m
I oxi ami é filis mi so, sen ninhun spetativa, sen spéra nada di ningen
Born autosufisienti N persebe ma na nha redór N ten tudu k'é sufisienti pa faze-m xinti ben
Purisu, mi é gradisidu pa tudu ki bu faze-m
Bu po-m diskubri un pisoa até nton diskonhisidu
Un pisoa okultu, un pisoa adormesidu ki obrigadu akorda dipos di tudu sufridu

Nha tétu kebradu, N djunta kaku mi so
Kuazi N perde nha txon
Sen ningen pa da-m mô
Nha lua paga
Nha lánpada fundi
I pa N ka funda, N navega na skuridon

Nes tenpestadi N subrivive mi so
Di tantu N ka ten osíliu N prende anda sen bo
Obrigadu entra Arka pa N rizisti dilúviu i sen ningen pur pértu pa spedja-m nha rafújiu
N ka tinha Alex, N ka tinha Júnior, N ka tinha Di, N ka tinha Carlos pur pértu pa supera ku mi
N ka tinha Yanni ki parte ku vontadi fika, más un kazu ki ti oxi pulísias ka justifika
So favor di favorisidus, es ta prega pugrésu mas kre-nu disfavoresidus, ma
Ami N ta rinase mó soldadus di Álamu i N bai buska nos tizoru na pirámidis d'Ejitu

Kes pode roba nos surrizu ma es ka poi nos sonhu prézu
Nos luta ka ta sesa inkuantu nos xama sta sézu
(Kes pode roba nos surrizu ma es ka poi nos sonhu prézu)
(Nos luta ka ta sesa inkuantu nos xama sta sézu)

Nha tétu kebradu, N djunta kaku mi so
Kuazi N perde nha txon
Sen ningen pa da-m mô
Nha lua paga
Nha lánpada fundi
I pa N ka funda, N navega na skuridon

Ma nen tudu é so lamentu tanbe N ten di agradese
Diós da-m família, da-m amigus ki nha vida ingrandese
Obrigadu papá, obrigadu Adi, obrigadu Michelle pa u-ki nhos faze pa mi
I sobritudu obrigadu pa bo ki sénpri duvida
Grasas a bo N da vida un vós ki nunka izistiba
Inda ben ki tudu nhas planus ka da sértu
Inda ben ki ten sértus kuzas ki é insértu
Inda ben N ka tive tudu di bandexa
Sénpri N tive ki sua pa kuzas ki N ta dizeja
Ma nen sénpri N tive tudu ki N almeja
Ma nen sénpri N tive tudu ki N almeja
Ma mésmu asin nunka N dexa-m frakeja
N prende ma fardu é ka maiór ki kel ki N pode karrega

N ta kontinua na saga, peregrinu di pé diskalsu na kalsadas di vida

Peregrinu di pé diskalsu na kalsadas di vida
Peregrinu di pé diskalsu na kalsadas di vida