Brinneso

Brínneso alla salute
dell'amirosa mia ca s'è sposata!
'E ccummarelle meje, ca nce só' ghiute
díceno che pareva una popata...

Ed indi poi noi li facciamo un brínneso
alla per noi difunda donna amata:

Vino vinello,
se per la donna il másculo è un trastullo
io ho stato l'Allirchino e il Purginello...

Mo rido e abballo,
e mme ne frocolejo della mia bella,
ché a queste scemitá nci ho fatto il callo!

Col calicio levato,
mme conto tutt''e llacreme chiagnute
per te, dorge ed indegno oggetto amato,
ca t'hê pigliato giuventù e salute...

Vevite amice: chisto è vino 'e Proceta...
n'atu bicchiere...e nce ne simmo jute!...

Vino sincero,
ho detto al cuoro, al povero mio cuoro:
Chiagne pe' cunto tujo, ca i' mo stó' allèro...

perché, a chest'ora,
mentre tu faje ll'Otello e ti disperi,
forse la signorina...è giá...signora!

Mo ca stó' frasturnato,
nun mme lassate sulo 'mmiez'â via...
V'aggio fatto spassá...mi ho dispendiato...
mo purtateme â casa 'e mamma mia.

E alla mia vecchia, vuje ll'avit''a dicere:
"Questa crapa è tuo figlio!" E accussí sia!...

Vinello puro,
mentre gli sposi stanno cuoro a cuoro,
che scherzo appresentarse dint''o scuro!...

Alla "signora"
io lle direbbe: "Nun avé paura:
Io sono un morto che cammina ancora!"