Sacke Zement

sacke zement noamål - hållådarå
sacke zement noamål - wås sågst denn då?
am 3. oktoba håmma d stimma åbgebn
neamd håt no gwißt wås ma då ålls dalebn
de blaun håmb gwunga de rotn valorn
und da zwerg mitn propella is glei drittbesta wordn
åls dritta då geaht a håt a gsågt vor da wåhl
in opposition und zwår auf jedn fåll
åba neamd wü se gern va da måcht absentiern
då låßt a se liaba a bißl sondiern
weil da präsident dichand und da klestil håmb gsågt
rot schwårz wa hiatzt wieda fi östarreich gfrågt
und so håbn se sondiert, und sondiert und sondiert
håmb se gegnseitig bloaßgstellt und völlig blamiert
und in kärntn is oana im bärntål ghuckt
und håt se vor låchn en bauch glei so druckt
weil oans håt da jörgi von ånfång o gwißt
daß der kloane mitn maschal de blaue krot frißt
2 wochn håts dauacht und ålls wår im såck
en statist in da hofburg håt koana mehr gfrågt
a regierungsprogramm in drei tåg håmb se gmåcht
weil gut ding braucht weile håm se se gedåcht
de pension de gibts späta weil de leit so lång lebn
karenzgeld vateiln ma mitn spritzkruag-system
es pickal werd teira da spritpreis bleibt hårt
sunst zåhlat jå der mehr der was a mehr fåhrt
ban strom und sein preis is ma a oans no nid gwiß
wieso a mehr kost - åba billiga is
und a steuererhöhung gibts nid daß d as woaßt
weil steuererhöhung hiatzt anpassung hoaßt
vor da wåhl håts no ghoaßn: nie wieda proporz
den proporz gibts no ållweil nur hiatzt in blau schwårz
i an minista und du n sekretär
so laft da austro-proporz seid jeher
nur de blaun minista des is nei am regiern
derfnt glei 66 blaue kassiern
66 blaue - då schrei i glei: hålt
weil fia de truppn is des übabezåhlt
nur oans håt se gändert - und des gånz sche flott
de fårblosn sozi de werdnt wieda rot
se håmb no oan gfundn - oda håbn s en wo gflaucht
der was åls obasozi koan nådlstreif braucht
er hat gar in moskau den boden geküßt
genau wia da påpst - der ålte sozialist
die insel der seeligen de liegt jetzt in scherbn
und europa wü uns vor de tia auße sperrn
weil oans håt da jörgolf bis hiatzt no nid gneißt
daß sei rechtspopo-lismus im auslånd nix reißt
es auslånd is gegn eahm von madrid bis paris
is jå gånz klår - weils voll auslända is
då tritt er schnell zruck um an schritt im blaun haus
und steuert de puppal von klågnfurt aus
weil wer då no da chef is - des is an jedn gwiß
wånn da jörgl nid wü håt de passer koan riß
und da kanzler der grinst nur stått daß a sie wehrt
weil er sunst glei vom bärntåla åbkånzlt werd
de regierung soll zoagn wås kånn sågnt de oan
mit glångt s scho bis hiatzt - en rest kånn se se spårn
hiatz hoaßts: mir sen mir - und wånns sei muaß alloa
mir san wieda opfer des is jå gånz klår
des triste ergebnis va da gånzn partie
is a schådn fia s lånd und die demokratie
gestan in da nåcht då håts ma wås tramt
da schwitz is ma gståndn - so hån i mi gschamt
im auslånd håbn s gfrågt - woher daß i kimm
drauf hån i gsågt daß i a deitscha bin
sacke zement noamål - hållådarå
sacke zement noamål - und hiatz is gå