Cill Chais

Cad a dhéanfaimid feasta gan adhmad?
Tá deireadh na gcoillte ar lár
Níl trácht ar Chill Chais ná a teaghlach
'S ní chluinfear a cling go brách
An áit úd 'na gcónaíodh an dei-bhean
Fuair gradam is meidhir thar mnáibh
Bhíodh iarlaí ag tarraingt thar toinn ann
'S an t-Aifreann binn dá rá

Ní chluinim fuaim lachan ná gé ann
Ná iolar ag éamh cois cuain
Ná fiú na mbeacha chun saothair
Thabharfadh mil agus céir don tslua
Níl ceol binn milis na n-éan ann
Le hamharc an lae dul uainn
Ná an chuaichín i mbarra na gcraobh ann
Ó's í chuirfeadh an saol chun suain

Tá ceo ag titim ar chraobh ann
Ná glanann le greín ná lá
Tá smúit ag titim ón spéir ann
'S a cuid uisce go léir ag trá
Níl coll, níl cuileann, níl caor ann
Ach clocha 'gus maolchlochán
Páirc na foraoise gan chraobh ann
Is d'imigh an géim chun fáin

Anois mar bharr ar gach míghreann
Chuaigh prionsa na nGael thar sáil
Anonn le hainnir na míne
'Fuair gradam sa Fhrainc 's sa Spáinn
Anois tá a chuallacht dá caoineadh
D'fhaigheadh airgead buí agus bán
'S í nach dtógfadh seilbh na ndaoine
'S í cara na bhfíorbhochtán

Aicim ar Mhuire 's ar Íosa
Go dtaga sí arís chughainn slán
Go mbeidh rincí fada 'gabháil timpeall
Ceol fidil 's tinte cnámh
Go dtógfar an baile seo ár sinsear
Cill Chais bhreá, arís go hard
Is go brách nó go dtiocfaidh and díle
Ná feicfear é arís ar lár