Rojas Silva upe Teniente pyahumi
Iporã ha ivaléva mitarusu
Veinte años omboty javetei
Hekove poty jera anga ipiru

Amoite Chaco ruguápe ojaitypo
Mondaha oipotáva ñande yvy
Mbya ndoguerekóvai korasõ
Moñáicha hesanga ha iñensuguy

Ha upérupi oguyguy osê oho
Teniente Rojas Silva itenonde
Anihag̃ua ojepo'o ñane retãgui
Marõve mamovégui ipehêngue

Amo Fortín Sorprésape osêmba
Bolikuéra hese omumurei
Ha'eñóma Rojas Silva ojehecha
Soldado hendive mbohapymi

Capitán boliviano upépe osê
Paraguáipeje korápe tomboty
Ha opo pe henondégui amoichaite
Rojas Silva mitã katupyryry

Ha oiko hechapyrã ñorãirõ
Bolikuéra imboka ombopiriri
Ha ñandéva leõicha opo opo
Kysépe hesekuéra onarei

Ha upéicha oî jave hikuái
Rojas Silva hapykuéguio ojejapi
Opo ipahaitéma Paraguái
Ombovíva hetã ha osapymi

Marisca Solano López amyrỹi
Epu'ãna, epu'ã terehecha
Mba'eichaitépa oñani ore roguy
Rehejáva ko yvy ári nde rata

Vy'águimo ikatúne opukavy
Opu'ãrõ ityvy ári Mariscal
Ohechárõ opyryrỹi ñande ruguy
Iky'atavove ñane retã

Paraguáiva enteroitéke pehendu
Topyta péne akãme che ñe'ê
Rojas Silva tape omoñepyrû
Ha jaha manteva'erã ñadefendé