¿Mamógui piko ahendu
Piriríta, ne ñe'ê?
¡Naimo'ãvéima va'ekue
Ko'árupi rojuhu!
Ko che ñe'ã reikutu
Ha vokóike upe guive
Techaga'u yma guare
Che ãngapema ipyahu

Che resa resarei
Pe korapýre ajere
Ape ha pépe ama'ê
Hi'ãgui rohechami
¿Mamómatepa avei
Reju ko asajepyte
Chembyesay hag̃uaite
Reñe'ê asyetei?

Kokueréremiko yma
Kurupíicha asajekue
Che pytu opahapeve
Ajeitými romuña
Ha ág̃a aju chetuja
Mombyrýma okágui aime
¡Ambyasy ahejahague
Ka'aguy ha ñu porã!

¿Oimévapuko oikove
Ako che tupãsymi?
Kuña koygua piretî
Che akãvaími hague
Mañeínepa ha'e
Cherehe naimandu'ái
Ajépa oime hesarái
Rojayhuetérõ guare

Py'avai ha ñaña
Upérõmi ndaikuaái
Ha okaragua naimo'ãi
Tesaráipe oikovaha
Ko'ág̃a péina ahecha
Ha upeicharupi heñói
Che kûre ko purahéi
Maymáva ohenduhag̃ua

Hípa upe ndajaikuaái
Kokueguára rekove
Ha okaragua rembiasa
Hípa upe ndajahechái
Hi'ãnte asapukái
Che ahy'o pyáu peve
¡Chokokue rekoasykue
Ja'érõ ndaja'epái!