Tamyapesã che ñe'ê
Mayma yvoty rekovia
Ha ipype toroañuã
Ko che py'a renyhê
Hetámi nde chembo'e
Chemitã'ípe yma
Ha heta mba'e porã
Aikuaa nderehe ae

Upéinte chekaria'y
Ko'ýte chemandu'a
Etémi cheakãhatã
Ha heta roipy'apy
Sapy'ánte ndepochy
Ko che nambi reipoka
Ha neipamírõ g̃uarã
Vokóikema rembyasy

Hetáko nderehe ae
Oiko ichugui karia'y
Ha mañeípa itavy
Osê porã joaite
Ajépa oiméne ndave
Revy'a nde juruvy
Rehecháramo ipoty
Ha omimbi nde rapekue

Akokuehe rohecha
Rehasa mombyrymi
Akói nekuñataî
¡Avápiko toimo'ã!
Ha chékatu chetuja
Osê osêma che atî
Ha che rovánga icha'î
¡Mbykýma che raperã!