Ymámipako ñande
Jaha va'erã kañyhápe
Ako taruma'i guýpe
Ñamopotî verapa
Jaguapy ha ñaha'ã
Tikichuéla ku vy'ápe
Ñande sýgui ñemihápe
Asajekue oke aja

Terã jahámi jaike
Yva reja ka'aguýpe
Jaiko jaipo'o ty'ãime
Apepu ha guavira
Nde ao ruguái renyhê
Rejuva'erã torypápe
Ha che ku mburukujápe
Nde áva amboyvotypa

Ko'ê ha jaikova'erã
Mokõive pe kokuerére
Oñokuãre kõinguemíicha
Jajoayhu porã asyete
Ñanandýremi jaike
Ku tape karê sa'íre
Ha umi ka'ysa ruguáre
Ñahendu guyra ñe'ê

Oiméva jeko yupa
Akóinte iporã hekópe
Jahahague mbyry'áirõ
Ka'arukue jajahu
Pe ýpe jajohypýi
Jajoapi yvyku'ípe
Ha upégui ku piro'ýpe
Pytûmbypávo jaju

Ñasãindýrõ pyhare
Ñasêmi pe nde rokáre
Kapi'ipe rovyûme
Ñande ñañombojaru
Upérõmi ñañandu
Hakuvy ñane ñe'ãme
Kunu'û porã apytépe
Ikyrỹiva mborayhu

Ko'ág̃aramo g̃uarã
Che képemante rejúva
Chemoirûmívo, Florencia
Ndavy'áigui cheañoite
Ha upégui ku apáy rire
Chepy'arory asýva
Chemandu'áramo aína
Ñanemitãrõ guare