Péinako la guerra opa
Py'aguapy oî jeýta
Ko'águi ñañembyatýta
Ñambo-viva ko tetã
Cañón, mortero, mboka
Umíva ñañongatúta
Rosádoma jaiguyrúta
Ñañemitỹma haguã

Machéteke tahãimbe
Tahi'ýva porãke azada
Ñamyengoviami espada
Chácope ipurupyre
Ha buey yunta karape
Ñamyakãsã yugo guýpe
Amarayvimi kangýpe
Súrcore ñamoma'ê

Jaikohaguéicha kuehe
Jajapo campo de tiro
Estaca, tala ha nido
Ko'ág̃a ñande kokue
Ñacumplipáma rire
La Pátriape jadebéva
Hi'ãma arado mancera
Japokomívo hese

Ñañotỹnteke avati
Petỹ, mandyju, naranja
Umíva hína esperanza
Oro sellado voi
Kumanda ha manduvi
Kurãpêpê ijapytépe
Topukavy nde kokuépe
Heta piña avakachi

Pakova ha takuare'ê
Café, mango, mandarina
Mamóne, aguacate, lima
Nde rógare tojere
Jaju pe asaje pyte
Vokói ñamba'apohágui
Ãva guýpe javy'águi
Jaguapy jaterere

Oguapývo ka'a rykue
Sakarô, locro oguejýma
Mesápe ku jaguapýma
Jakarumi oñondive
Oúngo avati maimbe
Tembi'u týra hevéva
Paraguái rembi'uetéva
Roráre kamby jygue

Kyha chipa ñañotî
Piro'ýva yvyraguýpe
Ñande ra'y ñande ypýpe
Toguapymi toscribí
Ipizárrare tomoî
Ideber-rãmi ko'êrõ
Te'i ilección ome'êvo
¡Patria moriré por ti!