Bo tmá kaminhu di stréla
Bo dixa mundu di dor
Bo uni pa senpe bos kapéla
Bo konverte-m nun sofredor
Bo ngana-m na kel dia
Ke bo dos melodia bo da-m konsolason
Kantu margin notu dia, mi xei di aligria, N ba tmá bo benson
Foi un spónte grande kónde es dzê-m ke bo bai sen dispidi
Bo txa so rekordasan

Bo éra keride, bo éra kunxide
Sima un grande stréla luminos la na séu
Éra un sertéza na bo, sabura de fésta na bo mô
Na son mimóza de bo instrumente ke bo ama txeu
Ma na nha ideia, kes note di lua xeia
Serenata di lar en lar

Inda N t'uví na janéla
Kel son tan dos di bo viulan
Kel xoradinha na note de lua i stréla
Mi N ka kre sei, diziluzan
Inda N t'oia bo imájen ta txiga di viájen
Kansóde ma tude konténte
Dispos dun grande note d'arkada
Asves sen ganha nada, so pa legrá tude jente
Mi N ka ta lenbrá ter uvide bo dzê kma nau
So N ta lenbrá bo paixan

Kónde pa kazamente, na son de bo viulin
Kunpanhóde pa vióla, kavakin ma violan
Noiva ta txorá, junte ma mimóza
Bóxe de barul de fogete, debóxe murmur de multidan
Sants éra bo nóm, bo nóm ke bo dixa-m
N ta lenbró-be pa eternidade
Sants éra bo nóm, ainda ta limenta-m
Pa bo memória N ta pidi un minute de siléns