Addíu ca forra aceddu ca vulassi
E poi abbulassi nda na masseria
Tutti li mietituri salutassi
Prima lu capu e poi l'amanti mia
La fauci di lu pugnu ci luvassi
Ci ricissi: Arriposa, amanti mia
E 'nfazzulettu biancu ci tirassi
Stúiti 'stu sururi e pensa a mia

Addíu ca pisci finu mi facissi
Vinissi mpiscaturi e mi piscassi
Matinu a lu mircatu mi vinnissi
A mpicciutteddu cu na vuci chiara
Vinissi lu me amuri e m'accattassi
Nda na paredda ri uoru mi friissi
Nun minni mporta s'iddu mi manciassi
Basta nda lu so cori mi purtassi

E tulì tulì tulì
Quattru fimmini e ntarì
E ntarì ca è troppu pocu
Quattru fimmini e mpriccocu
E 'u priccocu e troppu aruci
Quattru fimmini e na nuci
E la nuci è troppu rura
Quattru fimmini e na mula
E la mula ietta cauci
Quattru fimmini e na fauci
E la fauci havi lu pizzu
Quattru fimmini e nvarbizzu
E 'u varbizzu havi l'ali
Quattru fimmini e ncanali
E 'u canali jetta l'acqua
Quattru fimmini e na vacca
E la vacca havi li corna
Quattru fimmini e na donna
E la donna voli satari
Supra i spaddi i mastru Natali
Mastru Natali co spitu 'ncoddu
Passa 'u ciume e si stocca 'u coddu