Dipos di un longu kaminhu
N djunta tudu nhas padás
Pa N fazi es múzika

Mi N kre kanta pa Iemanjá
Pa kolar azul i branku
Pa dias di glória protejidu
Mi N kre kanta pa fe di amá
Pa amizadi umildi i franku
Na dias txukaleru móda fuxidu

Mi N kre kanta pa nha gitara
Ki simia alegria i nina ódiu
Ki foi nha spada, nha krus i nha skudu
Mi N kre kanta pa kes sigara
Ki na lama i sen subi pódiu
Da-m izénplu antis di tudu

Mi N kre kanta pa un mudjer
Ki kantu mundu fitxa el e abri
Móda pórtas di mizerikórdia
Mi N kre kanta pamó N sabe lê
Foi asin ki N distrinsa ubri di madri
Pa konkista di nhas própis konkórdia

Mi N kre kanta finalmenti
Pa kes ki nunka obi-m ta kanta
Pamó distinu leba-s primeru
Mi N kre kanta manenti manenti
Pa óra ki N leba téra nha garganta
Pa e faze-l kantu e faze-l kanteru