Oguahêta San Juan Ára
¡Jaku'éke, che kompi!
Kapi'i hendy va'erãva
Ñambyaty ñambohovi

Aguara ruguái oiméne
Kokuerérehe heta
Ñande pópe ñamopêne
Ha ogaháre jaroja

Ñaimo'ãma ahechapáva
Henyhê chipa lopi
Oñuãramo okára
Morotî isarambi

Ha kamba ijapytépe
Upe toro omoñarõ
Ojeity ápe ha pepe
Chipa'i omono'õ

Avei tatapỹi ári
Jahasáne upe rire
Pynandi ha ndajakáiri
Pe San Juan ára jave

Ha ojupíne yvyrasỹire
Tapicha katupyry
Oguahêvo ijeguakápe
Oipo'o ha omboguejy

Herakuã mokõi carrera
Ijukýva oikotaha
Yvytúgui iñakuãvéva
Mbohapy mbarakaja

Ha vosápe oñemondéta
Mitã'i akãhatã
Oñaníta ha'ekuéra
San Juan-hápe vy'arã

Ku pelota hendypáva
Ochutáne umi kamba
Ha upéi ojehasáne
Kambuchi ojejoka

Hetaitéiko japukáne
Jahechárõ ndo'aséi
Nikelmi oguerekóva
Upe paila jeheréi

Veinticuatro pyharépe
Ñande atýkena ojohe
San Juan ará oguahêre
Ñambo-viva joaite