Kel kazinha na kel ladera
Na mei di sol i ventania
Éra un palós di pédra i kal
Konstruídu na mei di luta
N ta lenbrá surrizu di nha pai, enbóra kansóde
Se alegria d'oiá nos flisidade dezabrotxá

Kel kazinha na kel ladera
Éra un mundu maravilhoze
Inda N ta lenbra nos brinkadera
Nos iluzau, nos sóin kalóde
I na kansau de nos dezejus
Speransa no tinha di konxe mundu
Pa disfrutá se dose i se margos, tude se rikesa
I voltá un dia pa sinplisidadi di nos kazinha

Nha kazinha aoje ta-m ben lonje

Kel txalutera na se kintal
Éra un florésta pa aventura
Na sinéma de nos fantazias
Nos éra sporte kóntra bandide
Na óra minguóde, no tava diskansa
La na sónbra di se inpéna
No tava uví jente grande ta konversá, ta ralenbrá
Ta partilha tude ses rekordasan, ses musidade

Nha kazinha aoje ta-m ben lonje
Li na sidade d'aranha-séu
Vida levo-m pa ote ladera
Mas agreste, sen mute dusura

Kel txalutera oje já vra lénha
Tude já mudá, fká so lenbransa
Na mei dun mar de fmasa i kazaróna
Nha kazinha N perdê

Na kel ladera surjí un nove sidade
I ondê nha kazinha?
Ó, nha kazinha, ondê ke bo ta?
Pa nha kazinha já N kre voltá
Ó, nha kazinha, ondê ke bo ta?
Pa nha kazinha já N kre voltá

Ondê nha kazinha?
Ondê nha kazinha?
Ondê nha kazinha?
Ondê nha kazinha?