Ndéve g̃uarãnte péina aipyaháma
Iporãvéva ñe'êyvoty
Pype ha'évo ndéve, Zoraida
Ndeha yvy ári che tupãsy
Ndaipóri ndéicha ko arapýpe
Iporãmbáva kuñataî
Oime ikatúmo yvagapýpe
Nde kypy'ýmante avei

Lirio potýre ambojojáva
Kyrỹi asýgui pe nde rete
Ha morotîva aoveráicha
Ipiro'ýva pe nde pire
Ovevuimi sa'yjungýva
Nde ati'y ári ne akãrague
Jeheguieténte pytã asýva
Pe nde rova ha upe ne rembe

Po'i asy ha ikarapãmíva
Jasyra'ýicha nde tyvyta
Ha pe iguýpe hû omimbíva
Yvapurûicha pe nde resa
Amambái roky ku ijysapýva
Upéva hína nde ropea
Resapymívo ku ipotýva
Ha rema'êvo ojajaipa

Jeheguieténte ijeguakáva
Péicha ne akãgui nde py peve
Nde ko yvy ári umi mbyjáicha
Pe neporãgui rehesape
Pe ne ñe'ê ha pe nde pukápe
Remokyrỹiva che rekove
Chepohãnóva pe nde resápe
Paje meme upe ne ma'ê

Pe nde guata ku pyku'ipéicha
Ikonimbáva ha ijuky
Che ndajuhúiva márõ ko ndéicha
Iporãmbáva, che yvoty
Marangatúgui joheipyréva
Potî sakãva nde rekove
Che mba'erãnte roipotaitéva
Che py'aitégui ndéve ha'e